Johannes de Garlandia: 'Cornutus ('Distigium')


[1] Cespitat in phaleris hippus blactaque supinus,
Glossa velut temeto labat, hemes infatuato.
 
[2] Qui calus in praxi simul est et pisticus hemo,
Illius oda placet, hic recte theologizat.
 
[3] Qui cupide servas hypogeum gazophylantem,
Tardus ad uranici scandes algamata regni.
 
[4] Pseustes et ambrones, sycophantes, vispiliones
Styx et Cocytus, Lethe Phlegethonque rotabunt.
 
[5] Terga laphi dorcaeque latus delata popinae
An sint elixa vel assa, scit bene lixa.
 
[6] Bulla velut proceres, stola sic eburnea nuptas,
Utque cubile toral decusat, gausape mensam.
 
[7] Chironomon mensis, lectis assistit aliptes,
Dumetis auceps latet ac sicarius antris.
 
[8] Pusio rheumaticus, pullus lappatus et hirtus
Hinnulus herede numquam spernantur herili.
 
[9] Hinc elephas barrit, onocratulus hiccine bombit,
Ast onager rudit, ranunculus inde coaxat.
 
[10] Abra tenens speculum sese speculatur heramque,
Utque magirus hero sic et sibi praeparat escam.
 
[11] Stipes in andena sustentus deperit ardens,
Servicio sic saepe duli res tabet herilis.
 
[12] Qui multis duliam promittit heris placituram,
Pseudulus alterius fiet, non assecla verus.
 
[13] Barytonans onoma, cum debeat oxytonare,
Non est orthographus, sed agrammatus esse probatur.
 
[14] Hic non est hagius, quem cenodoxia vexat,
Quemque premit cachesis, non prodest diasynaxis.
 
[15] Inter Pygmacos regnat gnanus, straboque luscos,
Loripes extalos, monothalmus sic quoque caccos.
 
[16] Assit plena sero mea seria, theca lyaeo.
Promus et artocopis et acerna popina ferinis.
 
[17] Hernia prava proco, spurcum genus et vola cassa
Et polypus rhini malusque glaucoma thalmi.
 
[18] Fert anaphos pincerna, batos abatis, coquus orcas
Et puer anaphoram, capsam capser, armiger arpem.
 
[19] Hydria dat latices, oleum cadus, amphora vinum,
Et telum pharetra corioque reconditur ensis.
 
[20] Faecula non acinum, sed caupo cauma repellit,
Et bibulus musti bibliones arcet amurca.
 
[21] Archimandrita sit caelebs eusebiusque,
Atque crisis corde sit eique bolismus in ore.
 
[I.] Claviculis firmis, theos et anthropos, in pos et ir mis
Figor ob infirmi cosmos delicta, patir, mi.
 
[II.] Kyria chere hiera, cuius philanthropos est bar,
Per te doxa theos vecten uranicos ymas.


Text: Der Deutsche Cornutus. I. Teil. Der Cornutus des Johannes de Garlandia, ein Schulbuch des 13. Jahrhunderts. In den deutschen Übersetzungen des Mittelalters zum ersten Male hg. von Edwin Habel. Berlin 1908, S. 23-28.

(mb - 30/1/02)